Hebrews 11

Ninʒéŋ ninʒéŋ imuac hénia.

1Ninʒéŋ ninʒéŋ imi iwawai méŋac méŋ niŋkumuma kecanʒiŋ imuac héla ʒéma iwawai ménda héŋanʒiŋ imuac héipucya wanʒac. 2Ninʒéŋ ninʒéŋginaguc Yanda hécnina ʒéhiaru énécmimia waŋec.

3Ninʒéŋ ninʒéŋninaguc mia baec kurumeŋ yomi Anutunéŋ ʒéyu hicŋidarec imi niŋasarianʒiŋ. Imuac iwawai kicninanéŋ ménda héŋanʒiŋ imuacnec iwawai kicninanéŋ héŋanʒiŋ imi mihicŋidarec.

Abel, Enoko ʒéma Noa ionac ninʒéŋ ninʒéŋgina imuac hénia.

4Ninʒéŋ ninʒéŋaguc Abelnéŋ Kainac hofac oo ai imi ogicma Anutu hofac oo ai hiabianec memiyu Anutunéŋ hémma hofac oo ai imuac héŋu sécgéyu ʒéhiaru miyec. Waŋu inéŋ becnec humuyec, néŋ ninʒéŋ ninʒéŋanéŋ ac waŋ nénécmimanec kecʒac. 5Ninʒéŋ ninʒéŋaguc Enoko inéŋ kecma kekec yomuacnec humuc ménda mihicŋiyunec wagicma eŋec. Anutunéŋ wagicma keŋu muŋguc hémmuac séc qahac waŋec. Waŋu ménda wagicma eŋec nalé imuaru Inéŋ mia Anutu ewa hia mihicŋi miaŋec imuac Anutunéŋ ʒéhiaru miyec. 6Ninʒéŋ ninʒéŋnina qahac eŋ Anutu ségiségi mihicŋi miwiŋac séc qahac. Imuac Anutuac muru kembiŋ ʒé ninʒu imi eneŋ inéŋ hélacnec Kecanʒac imi ʒéma hoc tinʒarec mema kenʒu ionac mia bakia hiabia meleŋ énécmianʒac imi ninʒéŋgémuac hezac. 7Ninʒéŋ ninʒéŋaguc Noanéŋ haka méŋ kic wésiaiguc ménda hicŋiyec imuac walac ʒéhicŋi miyu bac yandi yandiyaguc wamma ac imuac eeya héima eŋeya iniŋ merachéra kekec mihicŋi énécmimaŋ ʒé ʒéic yanda imi meyacgéyec. Imuhuc wamma hakaya solaŋanéŋ baec ic ionac képésicgina mewininiyec. Waŋu imuhuc wamma kekec solaŋa ninʒéŋ ninʒéŋ igucnec hahaya imuac mératéc ic waŋec.

Abarahamac ninʒéŋ ninʒéŋaimuac hénia.

8Ninʒéŋ ninʒéŋaguc Abaraham imi héihéré miyec nalé imuaru ackuaʒéc imi niŋtohoyec. Niŋtohoma baec méŋ iwac buŋa wammac niŋ ʒémiyec imuac wamma dimuaru kemmac imi ménda niŋtegicmanec hénima keŋec. 9Waŋu ninʒéŋ ninʒéŋiguc baec méŋ iwac buŋa wammac niŋ ac ʒikima ézéyec imuaru kemma baec méréra imuaru kecaŋec. Kecma eŋeyaguc momacnec sisipac ac momacguc imuacnec mératéc meme ic kekera Isaka ʒéma Yakop iriguc momacnec sel haliiguc kecaŋgic. 10Hénia imi yomuhuc; Inéŋ ama areŋa yanda méŋ Anutu eŋeyaoc irec meme ic ʒéma mericqe ic wamma qambaŋa haiyec imuac mia kichihi wamma kecaŋec. 11Waŋu ninʒéŋ ninʒéŋaguc Sara eŋeyaoc acguc héfiŋa kecma embac yanda waŋec, néŋ sisipac ac wammiyec inéŋ méŋʒé méŋʒéya qahac imi ninʒéŋgéyec imuac niŋac yawuŋa imi séha ogicma sasala waŋec, néŋ kileŋ hériyaguc wawaŋawac kuha hamimia waŋec. 12Imuac mia ic momacguc humumia ésécnec iwarunec sawaiguc ménisikilu sasala ʒéma konduŋ giŋgiŋaiguc sakasac qétéya olombiŋac séc qahac imuac séciguc ɋelihéra sasala hicŋigic.

13Ic imi eneŋ mocʒoŋ ninʒéŋ ninʒéŋgina méndacma humudacgic. Waŋu sisipac ac imuac héla ménda énécmiyu megic. Néŋ eŋ lakec ou heyu hémma yaiʒézé ac wamma kecgic. Imuhuc kecma baeciguc neŋaŋ ic kiaŋ kecʒiŋ ʒéma ʒéau énécmiaŋgic. 14Haka imi mia imuhuc ʒéanʒu imi eneŋ imuhuc wamma eŋaŋ ama baecgina waima hagic imuac mia liliŋgéwiŋ ʒé kichihi wamma kecanʒu imuac hénia measarianʒac. 15Waŋu eŋaŋ ama baec waima hagic imuac niŋɋeliwunec imi nalé méŋ béréŋgéyu hia liliŋgéwunec. 16Waŋu ieneŋ mia ama baec hiabia séc méŋ kurumeŋiguc heheya imuac qeriginanéŋ héŋgeŋnec waŋanʒac. Imuac Anutu imi ionac Anutu ʒémimiawac gamuya ménda nimma ionac niŋ wamma ama areŋa yanda méŋ mézézéŋgé énécmiyec.

17Ninʒéŋ ninʒéŋaguc Abaraham imi batucgémiyec nalé imuaru Isaka Anutuac buŋa qemiyec. Sisipac ac wammiyu meyec, néŋ naŋa momacguc sac hemiyec imi waimimaŋ ʒé efiyec. 18Naŋa imuac mia, ac buŋa yomuhuc ézéyec, guac ɋelihécga ʒéénécmimia imi mia Isaka arunec hicŋisai wammu. 19Inéŋ Anutu imi humuc ic ionac sucgina igucnec meɋeli mimac niŋ kuha hemizac imi niŋhumuyec. Imuac ac héima ʒéni humuc igucnec meleŋ miyu meyecac séc wanʒac. 20Ninʒéŋ ninʒéŋaiguc Isaka imi haka biaŋguc hicŋimac imuac wamma Yakop ʒéma Esau mozoc ac ʒéérécmiyec. 21Ninʒéŋ ninʒéŋiguc Yakop imi mia humumaŋ ʒé waŋec imuaru Yosefe naŋ héréra iorac mozocgé érécmima tac witiyaiguc héima namma Anutu sicgémiyec. 22Ninʒéŋ ninʒéŋaiguc Yosefe imi humumaŋac ʒé wamma Israel ic embac eneŋ kecma Iʒipte baec waima kemmu ʒéma sirawac ʒéma walac ʒéseli énécmiyec.

Moseac ninʒéŋ ninʒéŋ imuac hénia.

23Mose hicŋiyu neŋgoc maŋgocya iereŋ héŋyic merac imi hiabia soroc waŋu ninʒéŋ ninʒéŋ giraiguc mia ic kewu Faraoac ʒézé seli imuac bac yandi yandi ménda wamma maso haréwéc séc musaŋgéyoc. 24Mose imi yandima ninʒéŋ ninʒéŋaiguc Farao bérarawac naŋa ʒémimiawac ménda wamma qeqetali waŋec. 25Imuhuc wamma képésic wawaŋawac siŋa, nalé hotoŋa heheya, imi waima néwécgeŋac Anutuac ic embac iniguc momacnec qenʒeŋ manʒeŋ mihicŋiwiŋ ʒéma niŋu sécgéyu héna imuac méndarec. 26Waŋu inéŋ bakia hiabia imuac kichihi waŋec, imuac niŋac Kristoac wamma gamu qeqe mihicŋi mimia imuac niŋu eŋeŋa waŋu Iʒipte baec igucnec soukiwa hinac mériaŋ imuhucya imuac niŋu mamaya waŋec. 27Ninʒéŋ ninʒéŋaiguc Inéŋ ic kewuac qeri gericyawac bac yandi yandi ménda wamma Iʒipte baec waima keŋec. Waŋu Anutu ménda héhéŋa imi kiwanéŋ héŋec tanec, iwac muru héiseliyec. 28Ninʒéŋ ninʒéŋiguc méréc merac unumuhuyec inéŋ Israel ic onac méréc merac hécgina ménda unumac niŋac nagu sacyaguc ogicma keŋkeŋa imuac kendoŋ ʒéma sac gilihéi imuac haka imi ʒéseliyec. 29Waŋu ninʒéŋ ninʒéŋiguc Israel ic eneŋ konduŋ pésia imi baec dokuya qahac ésécnec qericma keŋgic, néŋ Iʒipte ic ieneŋ imi batucgéma waŋgic konduŋnéŋ hoturu énécmiyu humudacgic. 30Waŋu ninʒéŋ ninʒéŋiguc ieneŋ, ai meme 7, Yeriko ama areŋa yanda lelecgéma keŋha waŋgic demiŋ selia imi bacgéma madarec. 31Ninʒéŋ ninʒéŋiguc héna yanda embac Rahap imi kicgaleŋ éréhéc luae qeérécmima érépésiyec. Imuac inéŋ acqeqe ic iniguc momacnec ménda humuyec.

32Waŋu ac tosia némaciguc toroqema ʒédacmaŋ? Gideon, Barak, Samson, Yipta, Dawidi, Samuel ʒéma, kua meme ic ionac suruc medacma ʒéwinec nalé henénʒac imi ménda sécgéwacnec. 33Ninʒéŋ ninʒéŋiguc ieneŋ héŋgaleŋ ama areŋa yanda sasala unuma onagicgic, haka solaŋa waŋgic, sisipac ac imuac héla mihicŋi énécmiyu megic, laion yaŋ kuagina miʒicgégic. 34Geric bélaŋ laiŋa héwécgégic, sou ʒéra igucnec qiʒiʒiŋgéma néŋgacgic, qeka meka igucnec seligigic, yaréiguc kucginaguc wamma téŋgiŋ ic tosara baecgina igucnec haʒéc hécgina ununesi waŋ énécmigic néŋgagic. 35Waŋu embac tosia imi eŋaŋ humuc ic hécgina ɋelima liliŋgégic muŋguc énépésigic. Waŋu ic tosia imi humuc igucnec yacyac hiabia mihicŋiwiŋ ʒé ʒéra waiya mihicŋi énécmigic hulac énécmimuac niŋ ménda waŋgic. 36Waŋu tosia ieneŋ ʒédesi ʒéma, hihilocnéŋ unuhéi imuac howura neniŋgic. Waŋu kileŋ tosara imi seŋ hésa ʒéma, hésa ama imuhucyaguc qenʒeŋ manʒeŋ mihicŋigic. 37Tosia ieneŋ hocnéŋ énérigic humugic. Tosia imi segenéŋ meric énécmigic éréhéc waŋgic. Tosia imi sounéŋ qeric énécmigic humugic. Waŋu tosia imi rama ʒéma noniŋ séwéla aturuma musaŋgé amuma keŋha wamma nene qahac kecma qenʒeŋ manʒeŋiguc ʒéma hénia qahac sicsaoc waŋ énécmigic kecaŋgic. 38Ic embac téréya imuhucya onac imi baec yominéŋ eeyaguc ménda wanʒac. Ieneŋ baec kisia ʒéma baec boŋa ʒéma baŋec ʒéma baec kifaŋaiguc heyac wamma keŋha waŋaŋgic.

39Ic embac imuhucya imi mocʒoŋ ninʒéŋ ninʒéŋgina niŋac Anutunéŋ ʒéhiaru énécmiyec, néŋ kileŋ ʒikiʒki acwac héla imi ménda mihicŋi énécmiyu megic. 40Némac niŋ, Anutunéŋ neŋaŋaru haka eeyaguc séc méŋ mézézéŋgédaru heyec. Imuac niŋ neŋaŋ qahac eŋacnec sac Anutunéŋ niŋu heyec imi hia mesolaŋimuac séc qahac waŋec.